2Cor 6 | NAS | STEP | Teeꞌkoo niiꞌ Kumponing-koo nariꞌ mintoomarimaing deemarima niiꞌke pia-antararampimaang doona otoko diiꞌke Kumponing bakaang piaa tampaꞌ komperimaatoainaꞌ.

2 Corinthians 6

Kara Okovuri Nkanukai Mankiꞌnanka Puruꞌaamanaꞌ

1 Teeꞌkoo niiꞌ Kumponing-koo nariꞌ mintoomarimaing deemarima niiꞌke pia-antararampimaang doona otoko diiꞌke Kumponing bakaang piaa tampaꞌ komperimaatoainaꞌ. 2 Aiꞌ Daari Meekung-koo eeꞌ minkuvuuꞌnung,

“Ninge tee nkaang piaa tenang oroꞌparamanang makotuioꞌ taararampiring, eeꞌnoko teꞌmung domang-antanaꞌmung-koo tee ninge pakurampiring.”
(Aisaiaꞌ 49:8)

Tee batei Kumponinge piaa oroꞌanta-koo minkuvuuꞌnung aung eꞌmung makotuioꞌ naurampimang. Eꞌmung eeꞌnaꞌmung teꞌmung niiꞌ domang-antanaꞌmung.

3 Ee aing, pinaunuka taarameriaing, aiꞌ niiꞌke aarumo naning tupang-antavampipeuꞌnung diiꞌkoo uroꞌkanooꞌke oroꞌantavampiaꞌ teing niikaning kara daang-antavupeuꞌnung. 4 Nka ookara nko-nkonankai niikaninge tee siraꞌmurimaung niiꞌ teing Kumponing bakaning botovotonaaꞌnuka. Oomereriaing niiꞌ tee aaꞌnaꞌ ivekaꞌmori mintoomarimaung, bane ainge eeꞌoroꞌnankai paaramuriko: arikanankai eeꞌnoko poreꞌnankai, napoꞌ papaaranankai meuꞌmuriko teka niikaang mintoong-koo meuꞌka. 5 Napoꞌ teie aaꞌnaꞌ muraꞌmaarimaunge, kiimatanava-koo siꞌmaarikooꞌ, totopurumaarima~. Eeꞌnoko napoꞌ takaaꞌmorikooꞌ, aasiꞌkoo toraꞌkampiarukooꞌ, peera ninka, diiꞌkoo ookara-koo. 6 Napoꞌ tasiꞌmereriai niiꞌ teing domang kirokainku, napoꞌ mataunukai, eeꞌnoko napoꞌ iira ninka mintoomariaunge, nka nantoong tampaꞌ nariꞌ tarearampimaung Tanuaang Meekung-koo kuunge piaa masikung ninka. 7 Niiꞌ teing kara masikung narung minkuampimaung Kumponing bakaang purintoꞌ kompampiri, eeꞌnoko tampara aarumo ookanaantai kaaꞌba-pinaꞌ kompampiritaaꞌ. 8 Amutemuriiꞌ otootoꞌkoo niiꞌ Kumponing bakaning bautaranuka-pinaꞌ oroꞌantamarimaung: tenang tampaꞌ nkomaariko niiꞌnooꞌ pooreꞌmaariko, tenang daangamaariko niiꞌnooꞌ daang-koo tuumpimaariko. Bane teie koomariri oꞌnoriko nka tee tokomaarimaatooꞌnaang. 9 Bane ookarai noruꞌmaaritaaꞌ, nka niiꞌninge noruꞌmaariaung-pinaꞌ nkomaarikooꞌ. Bane ampankeenaꞌ booꞌnanka-pinaꞌ noruꞌmaariko nka tee mmeꞌ domamariri oꞌnoring. Tenang muraꞌmaarima teie domang dupisiꞌmaariaung. 10 Bane orarunsi-antamaarikooꞌ, teka ookara batei-koo niiꞌ dotumariri oꞌnorimaung. Bane ataꞌkampiri, teka nantoong aaꞌnaꞌ biraankei maantoꞌantavarampimaung. Bane kapooꞌnavuꞌ otoꞌmemuriaꞌ, teka kapooꞌ ookara okomuri otong.

11 Diiꞌ niiꞌmaikororiꞌ Koorin-nupoong, niiꞌke tee siraꞌmariri naurarampimaung niikaang domang aaꞌnaꞌ daateꞌmariri. 12 Niikaang navunavu diiꞌkoo avoꞌmariaꞌ, teka diiꞌ deekoꞌ niiꞌkoo avoꞌdarimaung. 13 Ninge tee diiꞌ nkaning toirekaaꞌpinaꞌ kararampimang. Tampaꞌ makuꞌmeriaing diikaang domang daateꞌdariri.

Niiꞌ Teing Kumponing Bakanava Meekava Makosinuka

14 Teing ninka nantoong masikaꞌanta otoꞌevoroaing ninka nariꞌ pakeꞌdeeriaukaꞌ, aiꞌ tampara aarumo orara aarumo ninka arekeeꞌ nariꞌ meenaꞌporesi oroꞌparepeuꞌ? Eeꞌnoko araka naanka mutaanang arekeeꞌ nariꞌ otoresitaaꞌ oroꞌparepeuꞌ? 15 Eeꞌnoko Karistooꞌ naanka Sietaniꞌ arekeeꞌ marieerepeuꞌ? Naning Karistooꞌkoo baito-nung eeꞌnoko naning baitoropa aremeng-koo onou narung deemparepeuꞌ? 16 Arekeeꞌ teing daang-koong kansiꞌkoong kumponinanka Kumponing deto basi domampari otomaung bakaang pava dootuuꞌnava-koo makosiai teke otoropeuꞌ? Aiꞌ niiꞌ teing Kumponing domaang okonara bakanava makosinuka, Kumponinge aaꞌpuuꞌnaꞌkoo,

“Ning tee teing ninka nariꞌ oꞌnoaing eeꞌnoko teing ninka nariꞌ meuꞌke nanamaꞌnoai, eeꞌnoko ning tee biikaang Kumponing deemari oꞌnoaing eeꞌnoko teing teing napoꞌ nkaning nantoong deempariri otoroaing.”
(Boontu 26:11-12; Esikielaꞌ 37:27)

17 Teeꞌkoo Ovoringe napoꞌ aaꞌpuuꞌ:

“Oravitu-eta tontaꞌdarira taapoꞌke otoriai. Kapooꞌ kuꞌmiꞌpoꞌning komperiaꞌ eeꞌnoko diiꞌ ninge onkeonkeꞌdampiaing.
Eeꞌnoko ning tee diiꞌ Diuma deemari oꞌnoaing eeꞌnoko diiꞌ teing nnurukaaꞌ deentariri otoriaing, ookeng donkaang eeꞌnoko manikuꞌ. Teeꞌ minkuvuing teie Ovoring Purintoꞌke.”
18 (Aisaiaꞌ 43:6; 52:11; Esikielaꞌ 20:34,41)